ఖైరతాబాద్‌లో అప్పుడే మొదలైన ఉప ఎన్నిక ప్రచారం.. రప్పారప్పా అంటూ బీఆర్ఎస్ పోస్టర్

జూబ్లీహిల్స్ ఉప ఎన్నిక ముగియడంతో ఇప్పుడు అందరి దృష్టి ఖైరతాబాద్ అసెంబ్లీ నియోజకవర్గంపై పడింది. ఇక్కడ త్వరలో ఉప ఎన్నిక వస్తుందన్న ప్రచారంతో రాజకీయ వాతావరణం ఒక్కసారిగా వేడెక్కింది. అధికార కాంగ్రెస్‌లో ఆశావహులు అప్పుడే ప్రచారం మొదలుపెట్టగా, బీఆర్ఎస్ కూడా తాము సిద్ధమంటూ సోషల్ మీడియా వేదికగా సంకేతాలు పంపుతోంది.

2023 అసెంబ్లీ ఎన్నికల్లో బీఆర్ఎస్ తరఫున గెలిచిన దానం నాగేందర్, ఆ తర్వాత కాంగ్రెస్‌లో చేరి సికింద్రాబాద్ లోక్‌సభ స్థానం నుంచి పోటీ చేసి ఓటమి పాలయ్యారు. అయితే పార్టీ ఫిరాయింపుల విషయంలో సుప్రీంకోర్టు కఠినంగా వ్యవహరిస్తుండటంతో, దానం నాగేందర్ తన ఎమ్మెల్యే పదవికి రాజీనామా చేయక తప్పదనే ఊహాగానాలు జోరుగా వినిపిస్తున్నాయి. ఈ నేపథ్యంలోనే ఖైరతాబాద్‌లో రాజకీయ సందడి నెలకొంది.

ఈ అవకాశాన్ని అందిపుచ్చుకునేందుకు కాంగ్రెస్ నేతలు ప్రయత్నాలు ముమ్మరం చేశారు. మాజీ కార్పొరేటర్ రాజు యాదవ్, ఉప ఎన్నికలో టికెట్ తనకే కేటాయించాలని కోరుతూ ఖైరతాబాద్ ఫ్లైఓవర్ వద్ద, ఇతర కూడళ్లలో భారీ ఫ్లెక్సీలు ఏర్పాటు చేశారు. మరికొందరు నేతలు నేరుగా ముఖ్యమంత్రి రేవంత్ రెడ్డిని కలిసి తమ అభ్యర్థిత్వాన్ని పరిశీలించాలని కోరుతున్నారు.

మరోవైపు, బీఆర్ఎస్ కూడా ఉప ఎన్నికకు సై అంటోంది. ‘రప్పా రప్పా’ అంటూ సోషల్ మీడియాలో పోస్టులు పెడుతూ కార్యకర్తల్లో ఉత్సాహం నింపుతోంది. ఎన్నిక ఎప్పుడు వచ్చినా ఎదుర్కొనేందుకు సిద్ధంగా ఉన్నామని స్పష్టం చేస్తోంది. దీంతో అధికారిక ప్రకటన రాకముందే ఖైరతాబాద్ నియోజకవర్గంలో రాజకీయ వేడి ఊపందుకుంది.